Президент Садыр Жапаров "Кабар" агенттигине маек куруп, Орусияга жумушчу сапары, андагы сүйлөшүүлөр, орус тилинин макамы, өлкөдөгү сөз эркиндиги жана Балыкчы шаарынын жаңы дайындалган мэринин айланасындагы талкуулар боюнча пикирин билдирди.
Мамлекет башчы Орусияга жумушчу сапар менен барганын, анда эки өлкөнүн кызматташтыгы тууралуу гана кеп болгонун айтып, айрым маалымат каражаттарындагы "парламенттик шайлоону талкуулаганы барды" деген божомолдорду четке какты.
"Шайлоо биздин ички саясий ишибиз, аны качан, кантип өткөрүүнү эч ким менен кеңешпейбиз", деди.
Садыр Жапаров сапарында Орусия президенти Владимир Путин орус тилинин расмий макамы үчүн ыраазычылык билдиргенин белгилеп, кыргыздар орус тилине муктаж экенин айтты:
"Биринчиден, орус тили дүйнөлүк алты тилдин бири. Экинчиден, орус тилисиз биз Кыргызстандан алыс чыга албасыбызды эсибизден чыгарбашыбыз керек. Мисалы КМШ өлкөлөрүн айтпай эле коеюн, кошуна эле мамлекеттерди алалы. Өзбекстан менен Тажикстанга барсаң орус тилсиз сүйлөшө албайсың. Ошол эле Европа, Америка, Кытай өлкөлөрүнө барсаң орус котормочуларды колдонушат. Орус тил макамын өзгөртөлү деген саясатчылардын сунушу туура эмес. Албетте биринчи кезекте өзүбүздүн тилибизди өнүктүрүшүбүз керек. Бирок орус, англис тилин да билишибиз керек. Дүйнөнүн тең жарымы ушул эки тилди колдонушат. Азыркы өсүп келе жаткан жаштарыбыз 3-4 тилде сүйлөп жатышпайбы. Көп тилдерди билген жакшы да. Дүйнөнүн кайсы бурчуна барба эркин жүрөсүң".
Кыргызстан - орус тилине Баш мыйзам аркылуу расмий макам берген саналуу өлкөлөрдүн бири.
Акыркы убактарда бир катар тилчилер, жарандык активисттер кыргыз тилин өнүктүрүү үчүн орус тилинен расмий макамды алып салууну талап кылып келишет.(ZKo)